വിശേഷ ദിവസങ്ങൾ

വിനായക ചതുർത്ഥി

ഈ ദിവസം ക്ഷേത്രത്തിൽ പ്രധാന വഴിപാടായി അഷ്ടദ്രവൃ മഹാഗണപതി ഹോമം നടത്തപ്പെടുന്നു.


കാവിലടിയന്തിരം

കന്നിമാസത്തിലെ ആയില്യം നാളിൽ കാവിലടിയന്തിരവും, നൂറും പാലും പൂജയും നടത്തപ്പെടുന്നു. കൂടാതെ എല്ലാ മാസവും ക്ഷേത്ര കാവിൽ ആയില്യം പൂജയും നടത്തപെടുന്നു.


ശ്രീമദ് ദേവിഭാഗവതനവാഹജ്ഞാന യജ്ഞവും നവരാത്രി സംഗീതോത്സവവും

പ്രത്യേകം തയ്യാറാക്കിയ യജ്ഞശാലയിൽ ശ്രീമദ്‌ദേവി ഭാഗവത പാരായണവും പ്രഭാഷണങ്ങളും വിശേഷാൽ പൂജകളും ദീപാരാധനയ്‌ക്കു ശേഷം നവരാത്രി സംഗീത്സോവവും നടക്കുന്നു.
ദുർഗ്ഗാഷ്ടമിക്ക് അഷ്ടദ്രവ്യ മഹാഗണപതി ഹോമവും, പൂജവെയ്പും, മഹാനവമിക്ക് പുഷ്പാഭിഷേകവും, വിജയദശമിക്ക് പൂജയെടുപ്പും വിദ്യാരംഭവും തുടർന്ന് സമൂഹ സദ്യയും, മുല്ലൂർകുളങ്ങര ദേവി ക്ഷേത്രത്തിലേക്കുള്ള അവഭൃത സ്നാന ഘോഷയാത്രയോടെ നവാഹ നവരാത്രി ഉത്സവത്തിന് സമാപനം കുറിക്കുന്നു.


വൃശ്ചിക ചിറപ്പു മഹോത്സവം

വൃശ്ചികം ഒന്നു മുതൽ 40 നാൾ നീളുന്ന ചിറപ്പുമഹോത്സവവും കളമെഴുത്തും പാട്ടും ക്ഷേത്രസന്നിധിയിൽ നടത്തപെടുന്നു.
40-ാം നാളിൽ ഗുരുതി പൂജയോടെ ഇതിന് സമാപനം കുറിക്കുന്നു. വൃശ്ചികം ഒന്നാം തിയതി ഭക്തജനങ്ങളുടെ വഴിപാടായി വാദ്യമേളങ്ങളുടെ അകമ്പടിയോടുകൂടി ക്ഷേത്രത്തിനു ചുറ്റും ഉരുളിച്ച വഴിപാട് നടത്തപ്പെടുന്നു.


പൊങ്കാല മഹോത്സവം

മകരമാസത്തിലെ ആദ്യത്തെ ഞായറാഴ്ച്ച ക്ഷേത്രസന്നിധിയിൽ പൊങ്കാല മഹോത്സവം നടത്തപെടുന്നു.


ധനു ഭരണി

എല്ലാവർഷവും ധനുമാസത്തിലെ ഭരണി നാളിൽ പ്രത്യേക കളമെഴുത്തും പാട്ടും നടത്തപ്പെടാറുണ്ട്.


പറയക്കെഴുന്നെള്ളത്തും സമാപന ഘോഷയാത്രയും

കുംഭബ്ഭരണി മഹോത്സവത്തിന്റെ മുന്നോടിയായിട്ടുള്ള മഹാദേവിയുടെ പറയ്ക്കെഴുന്നള്ളത്ത് ഏഴംകുളം തെക്കെ മുറിയിൽ നിന്നും ആരംഭിച്ച് ഏഴംകുളം വടക്ക്, അറുകാലിക്കൽ കിഴക്ക്, അറുകാലിക്കൽ പടിഞ്ഞാറ്, നെടുംമൺ, പറക്കോട് തെക്ക്,പറക്കോട് വടക്ക്, പറക്കോട് ഇടയിൽ, മങ്ങാട്ട്, ചെറുക്കുന്നത്ത് മുറിയിൽ പര്യവസാനിക്കുന്നു.
പിറ്റേന്നു വൈകിട്ട് പറക്കോട് ശ്രീ ഇണ്ടിളയപ്പൻ സ്വാമി ക്ഷേത്രത്തിൽ നിന്നാരംഭിക്കുന്ന പറയിടിൽ സമാപന ഘോഷയാത്രയോടു കൂടി തന്നാണ്ടത്തെ പറയ്ക്കെഴുന്നള്ളത്തിന് സമാപനം കുറിക്കുന്നു.


മീന ഭരണി

അന്നേദിവസം തട്ടയിൽ ഒരിപ്പുറത്ത് ഭഗവതി ക്ഷേത്രത്തിൽ ഏഴംകുളത്തമ്മ പോകുന്നു എന്ന സങ്കൽപ്പത്താൽ തിരുനട തുറക്കാത്ത ദിവസം.


മേട വിഷു

ഈ ദിവസം ക്ഷേത്രത്തിൽ വിഷുകണി ദർശനവും അതോടനുബന്ധിച്ച് ക്ഷേത്ര മേൽശാന്തി ഭക്തജനങ്ങൾക്ക് കൈനീട്ടം കൊടുക്കുകയും ചെയ്യുന്നു.


രാമയണ മാസാചരണം

കർക്കിടകം ഒന്നുമുതൽ മാസാവസാനം വരെ രാമയണ പാരായണം നടത്തപ്പെടുന്നു.